Алматы қаласында Шанхай ынтымақтастық ұйымына мүше елдердің Байланыс және ақпараттық технологиялар министрлерінің отырысы өтті.
Іс-шараға Иран Ислам Республикасынан Байланыс және ақпараттық технологиялар министрі Иса Зарепур қатысты.
Иранның Байланыс және ақпараттық технологиялар министрі іс-шарадан кейін Іranpress агенттігіне отырыс жөнінде пікірін білдіріп, сұхбат берді.
Иса Зарепур сұхбат барысында Ирандағы цифрлық үкіметке шолу жасап, «Иран ашықтықты, тиімділікті әрі қолжетімділік пен есептілікті арттыру үшін электрондық үкімет қызметтерін кеңейтуде айтарлықтай жетістіктерге жетті», — деді.
Зарепур сөзін жалғастырып: «Кездесуде Иранның коммуникациялық инфрақұрылым мен цифрлық қызметтерді дамытудағы жетістіктері талқыланды және Шанхай ынтымақтастық ұйымының байланыс және цифрлық секторда Иранның ортақ платформалар салу және бірлескен ғарыштық ынтымақтастық құру жөніндегі ұсыныстарын ұйымға мүше елдердің байланыс және ақпараттық технологиялар министрлері құптады»,- деді.
Сондай-ақ, Иса Зарепур «Біздің міндетіміз — ынтымақтастық және киберкеңістіктің қауіпсіз жолдарын табу. Жаңа технологиялар қарқынды дамып келе жатқандықтан олқылықтардың орнын толтыру үшін қажет шараларды мүмкіндігінше тезірек қабылдау қажет. Цифрлық трансформация — бұл сыбайлас жемқорлықты азайтуда, жұмыспен қамтуды арттыруда, ашықтықты және кедейлік пен теңсіздікті азайтуда маңызды рөл атқаратын жаһандық үрдіс»,-деп атап өтті.
Иранның Байланыс министрі: «Менің ойымша, біз елдеріміз арасындағы сауданы ілгерілететін цифрлық платформаларды біріктіру және ортақ деректер орталықтарын құру арқылы ынтымақтастығымызды арттырамыз. Иран трансшекаралық талшықты-оптикалық желілер, деректер орталықтары және спутниктік байланыс сияқты цифрлық инфрақұрылымды дамытуда ынтымақтастық орнатуға дайын», — деп қорытындылады сөзін.



















