Иран АҚШ халқын емес, биліктің саясатын жау санайды
Иран американдықтарды жау санамайды, бірақ Америка Құрама Штаттары билігінің саясатын дұшпандық деп есептейді.
Еуразия Тудейдің хабарлауы бойынша, бұл туралы Иран Ислам Республикасының Сыртқы істер министрі Аббас Арақчи америкалық MSNBC телеарнасына берген сұхбатында мәлімдеді. Аббас Арақчи: “Біз Америка мемлекетін, америкалықтарды жау санамаймыз. Алайда Америка Құрама Штаттары үкіметінің Иранға қатысты жүргізіп отырған саясатын дұшпандық деп есептейміз”,-деді.
Сондай-ақ Арақчи келісімнің сәтті болуы толығымен Америка Құрама Штаттарына байланысты екенін атап айтты.
Министр Иранның ядролық бағдарламасы бойынша келісімге тек АҚШ Иранға құрмет танытқан жағдайда ғана қол жеткізуге болатынын баса айтты. Аббас Арақчи Иранның ядролық мәселесін әскери жолмен шешу мүмкін емес екенін айтып, дипломатияны жалғыз шешім деп атады.
Айта кетейік, Иран Сыртқы істер министрі 20 ақпан күні Ресей Сыртқы істер министрі Сергей Лавровпен телефон арқылы сөйлесіп, Тегеранның ядролық бағдарламасы төңірегіндегі жағдайды талқылады. АҚШ президенті Дональд Трамп Иранның 10-15 күн ішінде маңызды ядролық келісімге қол жеткізуі қажет екенін, кері жағдайда оның салдары өте жаман болатынын мәлімдеді.

















