Қазақстаннан мұздатылған етті Иранға экспорттауға уағдаласты. Екі жақты меморандумға Теһранда қол қойылды.
ҚР Ауыл шаруашылығы министрлігінің мәліметінше, екі жақты меморандумға 2023 жылдың 3 желтоқсаны күні Теһранда министрдің орынбасары және Иранның ветеринарлық ұйымының басшысы Моджтаба Норузи мен Қазақстанның ауыл шаруашылығы вице-министрі Аманғали Бердалин қол қойды.
Қазіргі уақытта қазақстандық өндірушілер Иранға сақтау мерзімі 3 күнге дейінгі тоңазытылған сиыр етін ғана жеткізе алады. Енді тараптар Иран Қазақстаннан мұздатылған сүйексіз сиыр етін импорттауға ветеринариялық-санитариялық талаптар қояды деп келісті.
Осыдан кейін экспортты ашу үшін Иранның ветеринариялық ұйымы мен ҚР АШМ Ветеринариялық бақылау және қадағалау комитетінің басшылары арасында ветеринариялық сертификаттарды келісу және рұқсат құжаттарына қол қою жоспарлануда.
Сондай-ақ, Қазақстан тарапының өтініші бойынша Иран ірі қара малдың вакуумдық қаптамадағы жаңа етінің жарамдылық мерзімін 3 күннен 16 күнге дейін ұлғайту мүмкіндігін қарастыруға дайын. Ол үшін Иран тарапы Қазақстаннан сиыр етінің жарамдылық мерзіміне қатысты ғылыми құжаттарды сұрады.
Сонымен қатар, Қазақстан ирандық сүт кәсіпорындарын Еуразиялық экономикалық одақ аумағына және ҚР-ға сүт өнімдерін импорттауға құқығы бар үшінші елдердің тізіліміне енгізу мақсатында ынтымақтасуға дайын екенін мәлімдеді. Ол үшін Иранның ветеринарлық қызметі мен сүт кәсіпорындарына аудит және бірлескен инспекция жүргізу көзделіп отыр.


















