Израиль әуе, құрлық, теңіз арқылы Газа секторының оңтүстігіндегі Рафах қаласын бомбылап жатыр. Соңғы екі күн бойы шабуыл тоқтамаған. Израильдің бұл шабуылына халықаралық ұйымдар алаңдаушылық танытып отыр.
Израиль әскерінің Мысырмен шекаралас Рафах қаласына жасаған жан-жақты шабуылынан жүзден астам адам қаза тауып, жүздеген адам жараланған. Бұл туралы палестиналық WAFA ақпарат агенттігі Рафах қаласы ауруханасының мәліметіне сілтеме жасап хабарлады.
Халықаралық ақпарат құралдарының ақпаратына сәйкес, Израиль Рафахтың орталық аудандарын, тұрғын үйлер мен мешіттерді нысанаға алып, үздіксіз атқылап жатыр.
Рафах қаласында Газа секторынан қоныс аударған босқындар көп шоғырланған. Израиль қорғаныс министрі Йоав Галант 1 ақпанда Рафахқа шабуыл жасайтындарын мәлімдеген болатын.
Израильдің шабуылына Біріккен Ұлттар ұйымы мен халықаралық қауымдастықтар алаңдаушылық білдіріп отыр.
Кеше Қытай Сыртқы істер министрлігінің өкілі арнаулы мәлімдеме жасап, Рафах қаласына жасаған қуатты әуе шабуылын тезірек тоқтатып, гуманитарлық апаттың алдын алуға шақырды.
Қытайдың хабарында: «Біз бейбіт тұрғындарды нысанаға алған және халықаралық құқықты бұзатын әрекеттерге қарсымыз және айыптаймыз» деп жазылған. Қытайдың бұл пікірін бүгін «Синьхуа» агенттігі жариялады.



















