Иран АҚШ Президенті Дональд Трамптың Ислам Республикасының көшбасшысы аятолла Әли Хаменеиге жолдаған хатына ресми түрде жауап қайтарды.
Еуразия Тудейдің хабарлауы бойынша, бұл туралы Иран Сыртқы істер министрі Аббас Арақчи мәлімдеді.
Аббас Арақчи ИРНА агенттігіне берген сұхбатында: “Трамптың хатына сәрсенбі күні тиісті түрде жауап қайтарылып, Оманның делдалдығы арқылы жіберілді”, — деді.
Арақчидің айтуы бойынша, Трамп хатына берілген жауапта екі құжат бар. Бірінші құжатта Тегеранның әлемдегі қазіргі жағдайға қатысты көзқарасы баяндалса, екіншісінде Трамптың хатында қамтылған тезистер толығымен талданып, түсініктеме берілген.
Айта кетейік, 7 наурызда АҚШ Президенті Дональд Трамп Truth Social әлеуметтік желісіндегі парақшасында Иранның діни жетекшісі аятолла Әли Хаменеиге Тегеранның ядролық бағдарламасы бойынша келіссөз жүргізу туралы ұсыныс жасап, хабарлама жібергенін жазды.
Хаменеи Америка Президентінің бұл мәлімдемесіне түсініктеме беріп, елінің АҚШ-пен диалог жүргізбейтінін, себебі Вашингтон тек өз мүддесін ойлайтынын баса айтты.

















