Ресей президентінің баспасөз хатшысы Дмитрий Песков Ресей мен Иранды одақтас ел деп атады.
Еуразия Тудейдің ТАСС агенттігіне сілтеме жасап хабарлауы бойынша, Дмитрий Песков брифингте Ресейдің қазір АҚШ-мен қарым-қатынасын қалпына келтіріп жатқанын, сонымен қатар Иранның да серіктес ел болып табылатынын мәлімдеді.
Ресей президентінің баспасөз хатшысы АҚШ Президенті Дональд Трамптың “Иранға қарсы қосымша баж салығын енгіземіз” деген қоқан-лоққысына осындай түсініктеме берді.
Кремль өкілі: “Біз қазір АҚШ-мен қарым-қатынасымызды қалпына келтірудеміз. Бірақ, Иран да біздің серіктесіміз, одақтасымыз. Тегеранмен дамыған және көп салалы қарым-қатынасымыз бар”, — деді.
АҚШ Президенті Дональд Трамп 30 наурыз күні Иранның ядролық бағдарламасы бойынша келіссөзде ілгерілеушілік болмаса, екі аптадан кейін Иранға қосымша баж салығын енгізетінін айтты.
Мұның алдында да Трамп Ислам Республикасы келісімге қол қоюдан толық бас тартқан жағдайда бұрын-соңды болмаған бомбалауға тап болатынын айтып, сес көрсетті.
Иранның жоғарғы көшбасшысы Әли Хаменеи Трамптың қоқан-лоққыларына жауап беріп, АҚШ-тың сырттан шабуыл жасау мүмкіндігіне сенбейтінін, алайда Вашингтон Ислам Республикасында бүлік шығаруға тырысса, қатаң жауап алатынын айтты.

















