Венесуэла Президенті Николас Мадуро Беньямин Нетаньяхуды “21-ші ғасырдың Гитлері” деп атады.
Еуразия Тудейдің хабарлауы бойынша, Венесуэла Президенті Николас Мадуро Израильдің Иран аумағына жасаған ауқымды шабуылын қатаң айыптады.
Президент Николас Мадуро көпшілік алдында сөйлеген сөзінде Иран, Палестина, Йемен, Сирия, Ливан халықтарымен, сондай-ақ ондаған жыл бойы басқыншылық пен сыртқы араласуға ұшыраған барлық араб және ислам елдерімен ынтымақтасатынын баса айтты.
Президент бұл қақтығысты АҚШ, Ұлыбритания, Франция және Германия рөл атқарған “геосаяси қақтығыс” деп атады.
Венесуэла Президенті Израильдің Иранның нысандарына жасаған шабуылын халықаралық құқық пен БҰҰ Жарғысын тікелей бұзу деп атап, оны бүкіл аймақтың болашағына қауіп төндіретін қылмыс деп сипаттады.
Оның пікірінше, Батыстың бұл әрекеттерге үнсіз қалуы мен қолдауы ірі державалардың Израиль басқыншылығын жасырып отырғанын көрсетеді.
Мадуро Израильді ресурстарды басып алуға, халықтарды құлдыққа айналдыруға және аймақтың геосаяси ландшафтын күштеп өзгертуге бағытталған отаршылдық саясаты үшін айыптады.
Венесуэла Президенті халықаралық қауымдастықты фашистік және неонацистік шабуылды тоқтату үшін саяси және дипломатиялық күш-жігерді шұғыл жұмылдыруға шақырды.



















