Тегеран-Душанбе бағыты бойынша тұрақты әуе қатынасы қайта жолға қойылды.
Еуразия Тудейдің хабарлауы бойынша, Тәжікстан мен Иран арасындағы үш айға созылған үзілістен кейін тұрақты әуе рейстері қайта жанданып, кеше, жексенбі, 31 мамыр күні Иран астанасы Тегераннан шыққан ұшақ Душанбе қаласына келіп қонды. Иранның Varesh әуе компаниясының алғашқы рейсі Тәжікстан астанасына 92 жолаушыны жеткізді. Душанбе халықаралық әуежайының мәліметінше, ұшақпен келгендердің басым бөлігі — Иран Ислам Республикасының азаматтары. Сол күні кері бағытта, яғни Душанбеден Тегеранға 122 жолаушы аттанды.
Иран мен Тәжікстан арасындағы әуе қатынасы осыдан үш ай бұрын, 28 ақпанда Америка Құрама Штаттары мен Израильдің Иранға жасаған шабуылдарынан кейін уақытша тоқтатылған болатын.
Рейстердің қайта жандануы екі мемлекет арасындағы көлік-логистикалық байланысты қалпына келтірудегі маңызды қадам болды. Сонымен қатар, әуе қатынасының қайта жандануы азаматтардың келіп-кетуін жеңілдетіп қана қоймай, Тәжікстан мен Иран арасындағы іскерлік, мәдени және гуманитарлық байланыстардың дамуына ықпал етеді.
Айта кетейік, 2026 жылғы 28 ақпанда Америка Құрама Штаттарының «Эпикалық қаһар» және Израильдің «Ақырған арыстан» деп аталатын Иранға қарсы операциялары басталып, салдарынан Иранның Жоғарғы көшбасшысы Әли Хаменеи, бірқатар жоғары лауазымды әскери және қауіпсіздік қызметкерлері мен бейбіт тұрғындар қаза тапты.


















