Иран СІМ басшысы Аббас Арақчи елінің уран байыту бағдарламасынан бас тартпайтынын мәлімдеді.
Еуразия Тудейдің хабарлауы бойынша, бұл туралы Иран Сыртқы істер министрі Сейед Аббас Арақчи Fox News телеарнасына берген сұхбатында айтты.
Аббас Арақчи Fox News телеарнасының тілшісі Брет Байердің неліктен Иран кейбір елдер сияқты байытылған уранды импорттамайтыны туралы қойған сұрағына: “Себебі, бұл біздің өз күшімізбен қол жеткізген ғылыми жетістігіміз. Неліктен біз импорттауымыз керек?”, — деп жауап берді.
Иран СІМ басшысы Израиль мен АҚШ-ның қысымына сілтеме жасап, елінің ядролық нысандары мен ғалымдарын қорғау қажеттігін баса айтты.
Сонымен қатар, Аббас Арақчи Иранның АҚШ-мен келіссөзге ашық екенін, алайда әзірге бұл тікелей келіссөз болмайтынын айтты.
Иран СІМ басшысы: “Егер АҚШ өзара тиімді шешім тапқысы келсе, мен олармен ынтымақтасуға дайынмын.
Біз Иранның ядролық бағдарламасының бейбіт мақсатта екенін және Иранның ешқашан ядролық қару жасауға ұмтылмайтынын дәлелдеу мақсатында қажетті кез келген сенім шараларын қабылдауға дайынбыз. Біз бұған жауап ретінде олар Иранға салынған санкцияларды алып тастайды деп күтеміз.
Ядролық бағдарламамыздың келіссөз арқылы шешімін тапқан тұстары болды. Біз мұны қайталауға дайынбыз”, — деді.

















