Ауғанстан аумағында интернет байланысы толық өшірілді.
Еуразия Тудейдің хабарлауы бойынша, Талибан қозғалысы дүйсенбі, 29 қыркүйек күні Ауғанстан аумағында интернет байланысын толық өшірді.
Ауғанстанда интернеттің толығымен өшірілгенін кеше NetBlocks халықаралық интернет бақылау қызметі тіркеді.
NetBlocks Telegram арнасындағы ресми хабарламасында: “Бұл Талибан билігінің моральдық нормаларды сақтау мақсатында қабылдап жатқан шараларының бірі”, — деп жазды.
Сондай-ақ, ұйымның мәліметінше, Ауғанстанда мобильді байланыс қызметінде де ақаулар тіркелген.
Талибан қозғалысы 2021 жылдың тамыз айында билікке келгеннен кейін қыркүйек айының ортасында моральдық нормаларды сақтау мақсатында Ауғанстанның солтүстігінде талшықты-оптикалық интернет желісін өшірген болатын.
Ауғанстан үкіметінің өкілі сол кезде тілшілерге: “Бұл шара әдепсіздіктің алдын алу мақсатында қабылданды. Алдағы уақытта халықтың қажеттіліктерін қамтамасыз ету үшін балама жүйе құрылады”, – деп мәлімдеген болатын.
AP агенттігінің дерегінше, алғашында бұл шектеулер тек Балх провинциясында енгізілген. Алайда Reuters агенттігі сол уақытта кабельдік интернет Балх, Құндыз, Бадахшан, Бағлан және Тахар өңірлерінде де болмағанын хабарлады. Сол кезде бірқатар өңір мен ірі қалалардағы мемлекеттік мекемелер, тұрғын үйлер мен жеке кәсіпорындар Wi-Fi желісінен мақұрым қалды.



















