Түркия Президенті Режеп Тайып Ердоған Ыстамбұлда өткен Палестинаны қолдаушы митингке қатысып, Израильді «оккупант» деп атады.
Жиында сөз сөйлеген Түркия Президенті Газадағы қырғынға Батысты кінәлады.
Израильдің «бейкүнә балалар мен аналарды, қарттарды өлтіріп жатқанын айтып, мұнысын әскери қылмыс» деп айыптады.
Израильді «басқыншы, мемлекет емес, ұйым» деп атады.
Режеп Тайып Ердоған сусыз, жарықсыз, тіпті азықсыз Газа халқын әлем көріп отырғанын, бірақ ешкімнің үндемейтініне ашынды.
Түркия Президенті «Кеше Украинаға көз жасын көл қылғандар, бүгін Газаға күле қарап отыр»,- деді.
Режеп Тайып Ердоған «Израиль сен оккупантсың. Сен мемлекет емес, жай ғана ұйымсың. Батыс сенің алдыңда әлденеге міндетті шығар, алайда біз сенің алдыңда ештеңкеге міндетті емеспіз»,- деді.
Сондай-ақ Түркия Президенті Израильдің бейбіт тұрғындарға жасаған шабуылын ештеңемен ақтап алуға болмайтынын баса айтты.
Режеп Тайып Ердоғанның бұл мәлімдемесінен кейін Израиль Түркиядағы елшілерін кері шақырып алды.
Айта кетсек, Ыстамбұл алаңына Палестинаны қолдап 1,5 млн адам жиналған.



















