Грекия Сыртқы істер министрі Георгиос Герапетритис бүгін, 5 қыркүйекте Түркияға ресми сапармен барады.
Түркия СІМ мәліметінше, Грекия Сыртқы істер министрі Георгиос Герапетритис Түркияға жұмыс сапары аясында Түркия Сыртқы істер министрі Хакан Фиданмен келіссөздер жүргізеді.
Тараптар екіжақты қатынастар мен өңірлік күн тәртібіндегі маңызды мәселелерді талқылайды.
Шілде айының ортасында Грекия Премьер-министрі Кириакос Мицотакис Грекия мен Түркия алдағы айларда қарым-қатынастарын дамытудың нақты жол картасын әзірлеуге дайын екенін хабарлаған болатын.
Сондай-ақ өткен айда Георгиос Герапетритис Афина Анкарамен теңіз шекарасындағы дауды шешу туралы келіссөздер жүргізуге дайын екенін айтты.
Айта кетсек, Түркия мен Грекия бірқатар мәселелер бойынша дауласуда.
Анықтама: Грекия мен Түркияның 200 шақырымдық ортақ шекарасы бар. Оның басым көпшілігі Эврос өзені бойымен өтеді. Көрші екі елдің қарым-қатынасында соңғы жылдары Эгей теңізіндегі Афина мен Анкара арасындағы шиеленіс мигрант дағдарысына байланысты өсті. Түркия көршісін Еуропа елдеріне ағылған заңсыз мигранттарды «кері қайтарды» деп айыптады.
Түркия мен Грекия шекарада жалаңаш мигранттар тобы табылғаннан кейін бір-бірін заңсыз иммигранттарға қатысты адамгершілікке жатпайтын әрекетке барды деп айыптады. Афинада хабарланғандай, шекарашылар екі елді бөліп тұрған Эврос өзенінің жағасында 92 жалаңаш мигрантты ұстаған. Грек деректеріне сәйкес, мигранттар түрік полицейлері оларды шешіндіріп, ұрып тастады деп шағымданған.
Ал Анкарада шекарадағы жалаңаш мигранттар оқиғасы алдымен арандатушылық деп аталды, содан кейін грек шекарашыларын қатыгездік әрекеті үшін айыптады.



















