Ыстықкөл «Blue Flag» сертификатын иеленген Орталық Азиядағы алғашқы көл атануы мүмкін.
Еуразия Тудейдің хабарлауы бойынша, Қырғызстан Түркияның қолдауымен халықаралық «Blue Flag» экологиялық бағдарламасын енгізуге дайындалып жатыр. Егер бұл бастама сәтті жүзеге асса, Ыстықкөл жағажайлары халықаралық жоғары экологиялық стандарттарға сай деп танылып, Орталық Азияда аталмыш мәртебеге ие болған алғашқы табиғи нысан атанады.
Қырғызстан бұл бастама аясында тұрақты туризм мен жағалау аумақтарын басқарудағы Түркияның, атап айтқанда, Анталияның озық тәжірибесін жан-жақты зерделеуде.
Қырғызстанның бұрынғы Мәдениет, ақпарат және жастар саясаты министрі Азамат Жаманкулов бастаған делегация маусым айында Анталиядағы «Blue Flag» сертификатын иеленген жағажайларды аралап, жағалауды басқару, су сапасын бақылау, қалдықтарды басқару және экологиялық ағарту бағытындағы озық тәжірибемен танысты.
TÜRÇEV (Түркияның Экологиялық білім беру қоры) өкілдерінің пікірінше, табиғи сұлулығы, суының мөлдірлігі әрі жоғары туристік әлеуеті бар Ыстықкөл аталмыш бағдарламаның талаптарына толықтай сай келетін негізгі үміткерлердің қатарында.
Мамандардың айтуынша, «Blue Flag» сертификаты тек судың тазалығын бағалаумен шектелмейді. Бұл бағдарлама аясында экологиялық менеджмент, қауіпсіздік шаралары, барлық азаматтарға қолжетімділік, қалдықтарды тиімді басқару және экологиялық ағарту жұмыстарын жүргізу сияқты қатаң халықаралық талаптар толық орындалуы тиіс.
Осы мақсатта Қырғызстанға арнайы ұлттық ұйымдастыру құрылымын құрып, су сапасына тұрақты мониторинг жүргізу, бірнеше пилоттық жағажайды жан-жақты дайындау және халықаралық стандарттарға толық сай келетін инфрақұрылымды дамыту қажет.
TÜRÇEV өкілдері бұл ынтымақтастықтың ұзақ мерзімді тәжірибе алмасудың бастамасы екенін атап өтіп, Қырғызстанға қажетті техникалық әдістемелік қолдауды бұдан әрі де жалғастыратынын мәлімдеді. Олардың пікірінше, егер жоба сәтті іске асса, Ыстықкөл өзге де туристік аймақтарға озық үлгі бола алады.



















