Иран Сыртқы істер министрлігі АҚШ-тың елдің оңтүстік жағалауына жасаған әскери шабуылдарын қатаң айыптап, бұл әрекетті атысты тоқтату режимін бұзу және ұлттық егемендікке қол сұғу деп атады.
Еуразия Тудейдің хабарлауы бойынша, Иран Сыртқы істер министрлігінің мәлімдемесінде Вашингтонның қатыгез шабуылдары екі мемлекет арасындағы өзара түсіністік меморандумында бекітілген атысты тоқтату режимін тікелей бұзғаны айтылған. Сонымен қатар, мәлімдемеде шабуылдар АҚШ билігінің өз міндеттемелеріне селқостығын және уәдеден таю Вашингтонның табиғатына тән екенін айқын көрсететіні жазылған.
Иран Сыртқы істер министрлігі: «Иран АҚШ-тың әскери басқыншылығынан өзінің ұлттық егемендігі мен аумақтық тұтастығын қорғауға толық бекініп отырғанын баса айтады», — деп мәлімдеді.
Айта кетейік, АҚШ Қарулы Күштерінің Орталық қолбасшылығының мәліметінше, жексенбіге қараған түні елдің Әскери-теңіз және Әскери-әуе күштері Ормұз бұғазында Иранның 10 әскери нысанына шабуыл жасады.
Шабуылға ұшыраған нысандардың қатарында әскери барлау инфрақұрылымы, байланыс жүйелері, әуе қорғанысы нысандары, дрон қоймалары мен мина төсейтін кемелер бар.
Ислам революциясы Сақшылар корпусы шабуылға қарымта әрекетте АҚШ-тың Кувейттегі әуе базасы мен Бахрейндегі Әскери-теңіз күштері базасына соққы жасады.

















