Иран Америка Құрама Штаттарының соғысты қысқа мерзімге тоқтату туралы ұсынысынан бас тартты.
Еуразия Тудейдің хабарлауы бойынша, Тегеран өз ұстанымын шабуылдарды жалғастыру арқылы білдірді.
Fars ақпарат агенттігінің дереккөзіне сілтеме жасап хабарлауы бойынша, Америка Құрама Штаттары 2 сәуір күні дос елдердің бірі арқылы қақтығысты 48 сағатқа тоқтату туралы ұсыныс жасаған.
Дереккөз: «Иран бұл ұсынысқа жазбаша түрде емес, ұрыс алаңында шабуылдарды жалғастыру арқылы жауап берді», – деді.
Fars агенттігінің мәліметінше, Америка Құрама Штаттары сондай-ақ атысты тоқтатуға қол жеткізу үшін дипломатиялық талпыныстарын Иранның Кувейттегі Бубиян аралында орналасқан америкалық әскери қоймаға жасаған шабуылынан кейін күшейткен.
Мұның алдында The Wall Street Journal басылымы Пәкістан бастаған делдалдардың бітімгершілік орнату әрекеттері тығырыққа тірелгенін хабарлады. Басылымның мәліметінше, Тегеран жақын күндері Исламабадта америкалық өкілдермен кездесуден бас тартып, Вашингтон талаптарының қабылданбайтынын мәлімдеген.
АҚШ президенті Дональд Трамп 3 сәуір күні Иранның жаңа билігінен жедел әрекет етуді талап етіп, инфрақұрылымдарға жаңа шабуылдар жасалатынын айтып сес көрсетті.
Трамп Truth Social желісінде: «Келесі кезекте – көпірлер, одан кейін – электр станциялары», – деп жазды. Бұған дейін АҚШ Тегеран мен Караж арасындағы B1 көпіріне шабуыл жасаған болатын. Шабуылдан кейін Трамп Иранды келісімге келуді жеделдетуге шақырды.
Ал Иран Ислам революциясының Сақшылар корпусы 2 сәуірде аймақтағы америкалық компаниялардың нысандарына, соның ішінде Дубайдағы Oracle деректер орталығына және Бахрейндегі Amazon бұлтты есептеу орталығына шабуыл жасалғанын хабарлады.
Сонымен қатар, 3 сәуір күні Иранның шабуыл нысанасына айналуы мүмкін АҚШ пен Израиль мүдделеріне қатысты кемелердің тізімін дайындағаны белгілі болды. Бұл туралы Иранның Мысырдағы дипломатиялық миссиясының басшысы Моджтаба Фердоусипур мәлімдеді.

















