Иран тоғыз айда азық-түлік импорты бойынша рекорд орнатты.
Еуразия Тудейдің хабарлауы бойынша, 19 қаңтар күні Иранға жеткізілген аса қажетті тауарлардың көлемі шамамен 183 мың тоннаны құрап, рекордтық көрсеткіш ретінде тіркелді.
Бұл туралы Иранның Кеден әкімшілігі мәлім етті. Мәліметке сәйкес, импортталған аса қажетті тауарлар Иранның әртүрлі өңірлеріне 8,03 мың жүк көлігі арқылы жеткізілген.
Соңғы бір тәулік ішінде елге шамамен 75,8 мың тонна бидай, 54,9 мың тонна жүгері және 15 мың тонна арпа әкелінген. Сондай-ақ 16,7 мың тонна соя күнжарасы, 2,63 мың тонна күріш, 3,11 мың тонна шикі өсімдік майы және шамамен 12 мың тонна майлы дақылдар импортталған. Сонымен қатар, түрлі астық өнімдері, қант, дәрі-дәрмек пен медициналық бұйымдар да жеткізілген.
Айта кетейік, Иран күнтізбесі бойынша ағымдағы жылдың 9 айында (2025 жылғы 21 наурыз – 21 желтоқсан) Ираннан экспортталған өнім көлемі шамамен 119 млн тоннаны құрап, жалпы құны 41,2 млрд АҚШ долларына жетті.
Иран тауарларының экспорты өткен жылдың сәйкес кезеңімен салыстырғанда құндық көрсеткіш бойынша 5,78 пайызға төмендеп, салмақ бойынша 1 пайызға артқан.


















