Оманда өткен Иран мен АҚШ арасындағы тарихи оқиғаға қатысты әртүрлі елдердің ресми өкілдері мәлімдеме жасап, қолдау танытты.
Еуразия Тудейдің хабарлауы бойынша, Иран мен Америка делегациялары сенбі күні Масқатта Оман Сыртқы істер министрінің арағайындығымен келіссөздердің бірінші кезеңін өткізді.
Әлем Иран мен АҚШ арасындағы бұл тарихи оқиғаға қатысты пікір білдірді.
Иордания
Иордания Сыртқы істер министрлігі Оманда өткен АҚШ пен Иран арасындағы жоғары деңгейдегі келіссөздерді құптады. Иордания Сыртқы істер министрлігінің ресми өкілі Суфьян әл-Куда сенбі күні жариялаған мәлімдемесінде Оман Корольдігінің дауларды диалог арқылы шешуге, аймақтық және халықаралық бейбітшілік пен қауіпсіздікті нығайтуға бағытталған дипломатиялық күш-жігерін қолдайтынын білдірді.
Мысыр
Мысыр Сыртқы істер министрлігі Иран мен АҚШ арасындағы келіссөздердің басталуын құптаған мәлімдеме жариялап, Оманға осы келіссөздердегі арағайындық рөлі үшін алғыс білдірді.
Мысыр СІМ Иран мен Американың диалог пен келіссөздер арқылы саяси шешім табуға бағытталған сындарлы көзқарасын құптады. Каир бұл қадам теңдестірілген келісімдерге қол жеткізуге әрі аймақтық шиеленісті азайтуға әкелуі мүмкін деп санайды.
Бахрейн
Бахрейн Сыртқы істер министрлігі де Оманда өткен Иран мен Америка арасындағы келіссөздерге қатысты мәлімдеме жасап, бұл қадамның аймақтық және халықаралық бейбітшілікті, қауіпсіздік пен тұрақтылықты нығайтуға көмектесуіне үмітін білдірді.
Бахрейн Үкіметі де бұл жоғары деңгейдегі келіссөздерді құптап, даулар мен қақтығыстарды бейбіт жолмен шешуге бағытталған бастамаларды қолдайтынын білдірді.
Ирак
Ирак Сыртқы істер министрі Оманда өткен Иран мен АҚШ арасындағы жанама келіссөздерді қолдайтынын, аймақтағы бейбітшілік пен тұрақтылыққа үміттенетінін мәлімдеді.
Кувейт
Кувейт Сыртқы істер министрлігі сенбі күні жариялаған мәлімдемесінде: “Кувейт Оманда өткен АҚШ пен Иран арасындағы жоғары деңгейдегі келіссөздерді құптайды. Кувейт бұл келіссөздер аймақтағы бейбітшілікті, қауіпсіздік пен тұрақтылықты нығайтуға ықпал етеді деп үміттенеді”, — деп айтылған.
Министрлік Оманның осы саладағы күш-жігерін жоғары бағалап, Кувейттің аймақтық және халықаралық қақтығыстарды диалог және дипломатиялық жолмен реттеуді қолдайтынын қуаттады.
Сауд Арабиясы
Сауд Арабиясының Сыртқы істер министрлігі Иран Ислам Республикасы мен Америка арасындағы келіссөздерде Оман Сұлтанатының арағайындық рөлі үшін ризашылық білдіріп, диалогты аймақтық және халықаралық барлық дауды шешу құралы ретінде қолдайтынын растады.
Корольдік Иран мен Америка келіссөздерінің нәтижелері аймақ пен әлемде қауіпсіздікті, тұрақтылық пен бейбітшілікті қамтамасыз ету бойынша бірлескен күш-жігерді нығайтуға ықпал ететініне үміт білдірді.
Қатар
Қатар Сыртқы істер министрлігінің мәлімдемесінде: “Қатар Масқат қаласында Оман Сұлтанатының арағайындығымен өткен Америка мен Иран Ислам Республикасы арасындағы келіссөздерді құптайды. Сонымен қатар, Оман Сұлтанатының атқарған рөлін жоғары бағалайды”,- деп жазылған.
Қатар аймақтық және халықаралық қауіпсіздікті, бейбітшілікті, тұрақтылық пен дамуды нығайту мақсатында АҚШ пен Иран арасындағы шешілмеген барлық мәселені шешу үшін дипломатиялық көзқарас пен диалогты толығымен қолдайтынын растады.
Ресей
Венадағы халықаралық ұйымдар жанындағы Ресейдің тұрақты өкілі Михаил Ульянов сенбі күні ядролық бағдарлама бойынша өткен Иран мен АҚШ арасындағы келіссөздер нәтижелерін үміттендірерлік деп бағалап: “Омандағы кездесудің қорытындысы бойынша ирандықтар да, америкалықтар да келіссөздерді оң және сындарлы деп сипаттады. Бұл үміттендіреді”,- деді.

















