Иранның балық экспорты 2025 жылы 30 пайызға өсті.
Еуразия Тудейдің хабарлауы бойынша, бұл туралы Иранның Балық шаруашылығы ұйымының басшысы Хамзе Ростампур мәлімдеді.
Хамзе Ростампурдың айтуы бойынша, Иран 2025 жылдың жеті айында, яғни наурыз айының ортасынан қазанның ортасына дейін құны 450 млн АҚШ долларына тең балық өнімдерін экспорттады.
Бұл өткен жылдың осы кезеңімен салыстырғанда шамамен 30 пайызға көп.
Экспорт көлемі сәуір мен қазан айларының аралығында 243 мың метрикалық тоннаны құраған.
Ростампур Иранның 2024 жылдың наурыз айы мен 2025 жылдың наурыз аралығында құны шамамен 700 млн АҚШ доллары болатын балық өнімдерін экспорттағанын айтты.
Иранның Балық шаруашылығы ұйымы басшысының болжамы бойынша, өндіріс пен экспорт көлемінің өсуіне байланысты өндіріс көлемі 2026 жылдың наурызына қарай 1,5 млн тоннаға жетеді.
Сонымен қатар, асшаяндар өндірісі биыл 60 мың метрикалық тоннаны құрайды деп күтілуде. Бұл бір жыл бұрынғы 45 мың тоннадан көп.
Иран 2030 жылға қарай балық өндірісін дамытып, жылдық өндіру көлемін 1,8 млн тоннаға дейін арттыруды жоспарлап отыр. Иран бұл саланы үлкен табыс көзі, экономикалық өсім факторы және оңтүстік өңірлерді қолдаудың маңызды құралы деп санайды.
Теңіз балығы, балық жемі, уылдырық және асшаяндар Иранның негізгі экспорттық тауарларының қатарына кіреді.
Иран, Балық шаруашылығы, Экспорт, Тауа


















