«Израиль қорғаныс министрі Йоав Галант қызметінен кетті, ал ХАМАС қалды».
Еуразия Тудейдің IRNA агенттігіне сілтеме жасап хабарлауы бойынша, мұндай мәлімдемені ХАМАС қозғалысының жоғары лауазымды өкілі Сами Әбу Зухри жасады.
Сами Әбу Зухри Палестинаның Шахаб ақпарат агенттігіне берген сұхбатында: «Бүгін сионистік режимнің Премьер-министрі Беньямин Нетаньяху Йоав Галантты қызметінен босатты. ХАМАС-ты жоятынын мақтанышпен айтқан Галант қызметінен кетті, ал ХАМАС қалды және қалады», — деді.
Израиль Премьер-министрі Беньямин Нетаньяху қарашаның 5 күні Йоав Галантты қорғаныс министрі қызметінен босатты. Галанттың орнына қорғаныс министрі болып Исраэль Катц сайланды.
Йоав Галант Израильдің қорғаныс министрі қызметін 2022 жылдың желтоқсан айынан бері атқарып келді.



















