Мәскеу қаласында Иран Сыртқы істер министрі марқұм Амир Абдуллаһианға арналған ескерткіш белгі ашылды.
Еуразия Тудейдің хабарлауы бойынша, шара Иранның қазіргі Сыртқы істер министрі Сейед Аббас Арақчидің қатысуымен Ресейдегі Иран елшілігінің резиденциясында өтті.
Мәскеуде ресейлік шенеуніктермен екіжақты кеңесу өткізу үшін сапармен барған Сейед Аббас Арақчи елшілік резиденциясының Салтанатты залына кіре берісінде ескерткіш белгіні ашып, Иран Сыртқы істер министрі марқұм Хоссейн Амир Абдуллаһианды еске алды.
Сонымен қатар Аббас Арақчи Ресейдегі Иран елшілігінің қызметкерлеріне арналған тұрғын үй кешенінің жаңа атауы жазылған мемориалдық тақтаны ашты.
Айта кетейік, Амир Абдуллаһианның қазасынан кейін Иран Телерадио корпорациясы директорының сыртқы істер жөніндегі орынбасары Ахмад Ноурузидің бұйрығымен Ұлттық БАҚ ғимаратына марқұмның есімі берілген болатын.
Иран Президенті Ибраһим Раиси, Сыртқы істер министрі Хоссейн Амир Абдуллаһиан және осы елдің басқа да жауапты тұлғалары мінген тікұшақ өткен жылдың 19 мамырында Иранның солтүстік-батысындағы Верзеған ауданында апатқа ұшырады.
Тікұшақ бортында болған сегіз адамның барлығы қаза тапты. Тікұшақ ішінде Ибраһим Раиси, СІМ басшысы Хоссейн Амир Абдуллаһиан, Шығыс Әзірбайжан губернаторы Малек Рахмати, Тебриз қаласының жұма намазы имамы аятолла Мохаммад Әли әл Хашем, Президенттік қауіпсіздік бөлімшесінің қолбасшысы Сейед Маһди Мусави және тікұшақтың басқа да экипаж мүшелері болды.


















