Ресей астанасындағы Әулие Петр мен Павел шіркеуінде “Ирандық ежелгі аспаптар мен орган” атты үлкен концерт өтті.
Еуразия Тудейдің хабарлауы бойынша, концертте “Меһрабанан” ирандық классикалық музыка ансамблі мультиаспапшы Хамид Реза Дадудың жетекшілігімен өнер көрсетті.
TV BRICS арнасының мәліметінше, музыканттар көрермендерге Һомаюн Хоррам, Әли Таджвиди, Рухолла Халеги және т.б иранның көрнекті композиторларының туындыларын ұсынды.
Бұл концерттің ерекшелігі шарада “ней” (қамыстан жасалған ашық флейта), “тонбак” (ирандық барабан), “даф” (дөңгелек соқпалы аспаптың бір түрі) және “сантур” (ішекті соқпалы аспап) сияқты Иранның дәстүрлі аспаптарының сүйемелдеуімен импровизациялық қойылым болды.
Хамид Реза Даду TV BRICS арнасына берген эксклюзивті сұхбатында ирандық классикалық композиторлардың музыкасы көрермендерді баурап, концерттің соңына дейін олардың назарын өзіне аударғанын айтты.
Хамид Реза Даду: “Иранның классикалық музыкасы өте эмоционалды, техникалық, сезімтал және әуенге көп көңіл бөледі. Ол жанға терең еніп, ерекше орындау техникасымен ерекшеленеді. Мен жеке немесе ансамбль құрамында өнер көрсеткен кезде көрермендерімнің көзінен музыканың оларға қалай әсер еткенін көремін. Ал, концерттен кейін олар менімен сөйлесіп, жылы лебіздерін білдіріп, өнер көрсеткенім үшін алғыс білдіреді”,- деді.
Сондай-ақ, ирандық музыкант Ресейде тұрған 15 жыл ішінде көптеген концерт беріп, көптеген ресейлік музыканттармен ынтымақтастық жасағанын айтты. Оның айтуынша, әріптестерімен және көрермендерімен қарым-қатынас оған әрқашан қуаныш сыйлап, Ресей халқының жылы қабылдауы, жомарттығы мен ашық рухы оған қуанышты әрі ұмытылмас естеліктер қалдырды.
Хамид Реза Даду: “Мен және менің әріптестерім музыка арқылы Иран мәдениетінің әсем әлеміне есік ашып, мәдени көпір салып, Иран мен Ресей халқы арасындағы достықты нығайта алдық деп ойлаймын”,- деді.
Хамид Реза Дадумен бірге сахнада Ксения Свириденко (орган), Любовь Завьялова (фортепиано), Александр Маломожнов (скрипка), Екатерина Миронова (виолончель), Анастасия Кутюхина (скрипка), Амин Исмаилу (скрипка), Эрфан Чангизи (скрипка) және Ясаман Гейболаһи (вокал) өнер көрсетті.


















