Меккедегі Сағат мұнарасы мұражайында қазақ тіліндегі аудиогид енгізіледі.
Еуразия Тудейдің хабарлауы бойынша, бұл туралы Қазақстанның Жидда қаласындағы Бас консулы Руслан Қоспанов пен Меккедегі Сағат мұнарасы мұражайының директоры Наиф әл-Маликимен кездесуінде талқыланды.
Тараптар кездесуде туризм, ғылым және мәдениет салаларында ынтымақтастықты талқылап, бірнеше келісімге келді.
Алғашқы кезеңде қазақстандықтарға мұражайға кіруде жеңілдіктер ұсынылып, ресми делегациялар үшін арнайы шарттар енгізіледі.
Сондай-ақ мұражайдың аудиогид жүйесіне қазақ тілі қосылады.
Кездесу қорытындысы бойынша тараптар тұрақты байланыс орнатып, қол жеткізілген уағдаластықтарды ресми түрде бекіту мақсатында тиісті құжаттарды дайындауға келісті.
Меккедегі Сағат мұнарасы мұражайы әл-Харам мешітіне қарсы орналасқан. Сағат Гиннестің рекордтар кітабына енген.



















