Қазақстанда “алтын виза” деп аталатын инвесторлық визаны алу қағидалары бекітілді.
Еуразия Тудейдің ҚР Сыртқы істер министрлігінің баспасөз орталығына сілтеме жасап хабарлауы бойынша, дәл осындай визалық бағдарламалар Еуропа, АҚШ, БАӘ және Сингапурда кеңінен қолданылады.
Жаңа талаптарға сәйкес, Қазақстан компанияларының жарғылық капиталына немесе отандық бағалы қағаздарға кемінде 300 мың АҚШ доллары көлемінде инвестиция салған шетел азаматтары инвесторлық визаны ресімдеу үшін өтініш бере алады.
Бұл “алтын виза” шетел азаматтарының Қазақстанда 10 жылға дейін тұруға рұқсат алу мүмкіндігін көздейді.
“Алтын виза” алғашқы ресми жарияланған күннен он күн өткен соң қолданысқа енгізіледі. Сол кезде Қазақстан Республикасының бейрезиденті болып табылатын, Қазақстан аумағында инвестициялық қызметті жүзеге асыратын тұлғалар өтініш жібере алады. Инвестициялық виза электронды өтініш арқылы рәсімделеді.
Үкімет капиталды қорғауға, тұрақты халықаралық экономикалық байланыстарды дамытуға бағытталған “алтын виза” бастамасын шетелдік инвесторларды көптеп тартып, елге қаржы мен жаңа технология әкелудің әрі олармен ұзақ уақытқа серіктес болудың жолы деп санайды.



















