Еркін күрестен тәуелсіз Қазақстан тарихындағы тұңғыш әлем чемпионы атанған Ризабек Айтмұхан Бүкіләлемдік күрес ұйымы (UWW) таңдаған үздік бес балуанның бірі атанды.
Ұлттық олимпиадалық комитеттің баспасөз қызметінің хабарлауынша, Бүкіләлемдік күрес ұйымы (UWW) әлеуметтік желіде болашағынан үміт күттіретін үздік бес балуанды ерекше атап өткен.
Жазбада: «Жұлдызы енді жанып келе жатқан осы бес балуанға назар салу керек. Олардың қайсысы Олимпиада медалін бірінші болып жеңіп алады?» — деп жазылған.
UWW ұйымының үздік балуандар тізбегінде еркін күрестен әлем чемпионы Ризабек Айтмұхан, бахрейндік Ахмед Тажудинов, әзірбайжандық Хасрат Жафаров, жапониялық Акари Фуджинами мен америкалық Амит Элордің есімдері аталған.
Еске сала кетсек, Ризабек Айтмұхан – еркін күрестен қазақтан жақында шыққан тұңғыш әлем чемпионы. Ол Белградта өткен әлем чемпионатында жеңіс тұғырының ең биік сатысынан көрінді.















