Тәжікстан мен Өзбекстанның Фотехобод-Ойбек шекаралық өткізу пункті базасында жаңа логистикалық орталық салынады.
Еуразия Тудейдің хабарлауы бойынша, Еуразиялық даму банкі, Тәжікстан Көлік министрлігі және Мемлекеттік-жекеменшік серіктестік жобаларын іске асыру орталығы Тәжікстан мен Өзбекстан шекарасында логистикалық орталық құру жобасының техникалық-экономикалық негіздемесін әзірлеуді бастады.
Техникалық жәрдем көрсету туралы үшжақты келісімге Душанбе қаласында қол қойылды.
Еуразиялық даму банкінің Техникалық жәрдем қоры техникалық-экономикалық негіздемені дайындауды және жобаның тиімділігін бағалау шығындарын қаржыландырады.
Тәжікстан Көлік министрінің орынбасары Шоиста Саидмуродзода бұл көлік саласындағы мемлекеттік-жекеменшік серіктестік тетігін пайдалана отырып іске асырылатын елдегі алғашқы жоба екенін айтты.
Еуразиялық даму банкінің Тәжікстандағы директоры Владимир Якунин заманауи логистикалық инфрақұрылымды дамыту Тәжікстанның 2023–2028 жылдарға арналған логистикасын дамыту мемлекеттік бағдарламасының басым бағыттарының бірі екенін мәлімдеді. Оның айтуынша, техникалық-экономикалық негіздемені әзірлеу трансшекаралық сауданың тиімділігін арттыратын ауқымды жобаны іске қосу жолындағы маңызды қадам болмақ.
Техникалық-экономикалық негіздемені дайындау аяқталғаннан кейін банк логистикалық орталықтың құрылысын қаржыландыру мүмкіндігін қарастыруға дайын. Жобаны іске асыру Тәжікстанның көлік-логистикалық жүйесін нығайтып, саланың инвестициялық тартымдылығын арттырып, өңірдегі сауда ағынының өсуіне жағдай жасайды деп күтілуде.
Мұның алдында Ойбек – Фотехобод өткізу пункті аумағында Өзбекстан – Тәжікстан сауда-өндірістік аймағын құру жоспарлары да қарастырылған болатын.



















