Иран астанасы Тегеран қаласында Iran Expo 2025 атты 7-ші халықаралық көрме өтеді.
Еуразия Тудейдің хабарлауы бойынша, 28 сәуір мен 2 мамыр аралығында Тегеран қаласында өтетін көрмеде Иранның экспорттық мүмкіндіктері мен әлеуеті көрсетіледі.
Иран Үкіметінің баспасөз хатшысы Фатеме Моһаджерани баспасөз мәслихатында сөйлеген сөзінде бұл шара әкімшіліктің жеке секторды қолдауға деген ұмтылысын көрсететінін айтып: “Бұл көрме Үкіметтің жеке бизнестің мүмкіндіктерін кеңейтуге үлкен көңіл бөлетінін көрсетеді”,- деді.
Ұйымдастырушылардың айтуынша, көрмеге әлемнің жер-жерінен екі мыңнан үш мыңға дейін шетелдік кәсіпкер қатысады деп күтілуде.
Көрме екіжақты сауда келіссөздерін жеңілдетуге, ирандық және халықаралық бизнес өкілдері арасында тікелей байланыс орнатып, келісім шарттарға қол қоюға бағытталған.
Көрме Иран мен Африка арасындағы экономикалық ынтымақтастық жөніндегі саммитпен бір мезгілде өтеді.
Иранның Сауданы дамыту ұйымының басшысы Мохаммад Әли Деһқан Деһнави көрмеге 110 елдің трейдерлері тіркелгенін айтты.
Оның айтуынша, бұл өткен жылмен салыстырғанда халықаралық қызығушылықтың артқанын көрсетеді. Сондай-ақ, Деһқан Деһнави ирандық компаниялардың да көрмеге үлкен қызығушылық танытып отырғанын айтты.
Ол іс-шараға дайындық кезіндегі мемлекеттік органдар мен ұйымдастырушылардың бірлескен күш-жігерін жоғары бағалап, Сауданы дамыту ұйымының көрменің сәтті өтуін қамтамасыз ету үшін қолда бар барлық ресурсты жұмылдырғанын қуаттады.


















