Нью-Йоркте ресми сапармен жүрген Түркия Президенті Режеп Тайып Ердоған Tesla компаниясының Бас директоры Илон Маскпен кездесті.
Режеп Тайып Ердоған Илон Маскты Нью-Йорктегі Türkevi-нде қабылдады.
Ердоған миллиардерді Tesla электр көлігі шығаратын жетінші зауытты Түркияда ашуға шақырды. Сондай-ақ Түркия Президенті елдің ғарыш бағдарламасы аясында SpaceX-пен ынтымақтастықты дамыту мәселесіне тоқталып өтті. Бұған қоса Режеп Тайып Ердоған Маскты Измирдегі Teknofest фестиваліне шақырды.
Маск Нью-Йоркте Ердоғанмен кездесуінде көптеген түрік жеткізуші фирмаларының Tesla-мен жұмыс істеп жатқанын және Түркияның Tesla компаниясының келесі зауытын салуға негізгі үміткерлердің бірі екенін атап өтті.
Сауд Арабиясы американдық Tesla компаниясымен Таяу Шығыс елінде өндіріс орнын салу туралы келіссөздер жүргізіп жатыр. The Wall Street Journal басылымының мәліметінше, келіссөздер енді басталып жатыр.
Эр-Рияд егер кәсіпорын өз елінде ашылса, қажетті шикізатты Конго Демократиялық Республикасынан жеткізіп отыратынын алға тартуда.
Жалпы, Tesla кәсіпорнын ашуға сол аймақтағы біраз елдер үмітті.
Украинадағы қақтығысқа дейін Илон Маск Ресейде Tesla зауытының құрылысын салу туралы айтқан еді. Әлемдегі саяси ахуал өзгерген соң Ресейдегі жобалар туралы айтылмады. Ал Ресейдің орнына Масктың Қазақстанды жетінші зауытының орны ретінде қарастырып жатқандығы туралы белгісіз.



















