Америка президенті Дональд Трамп қазіргі кезеңде Иранмен келіссөз жүргізуге мүдделі. Себебі Вашингтонның қақтығысты жалғастыруға дәрмені жоқ.
Еуразия Тудейдің хабарлауы бойынша, мұндай пікірді ТАСС агенттігіне берген сұхбатында белгілі түрік саясаттанушысы, Анкарадағы «Башкент» университетінің профессоры Хасан Унал білдірді.
Сарапшының айтуы бойынша, Америка Құрама Штаттарының халқы Израильдің ықпалы мен соғысқа түпкілікті қарсы.
Хасан Унал: «Менің түсінуімше, тараптар үлкен үмітпен отыр және келіссөзге дайын. Бұл Америка Құрама Штаттары үшін өте маңызды. Себебі Дональд Трамп өзін алданған әрі тығырыққа тірелгендей сезінуде. Ол бұл жағдайдан тезірек шыққысы келеді.
Америка Құрама Штаттарының бұл соғысты жалғастыруға бұдан былай қауқары жоқ. Олардың қару-жарақ қоры таусылды. Америкалық әскери кемелер, әсіресе авианосецтер еш пайдасыз болып қалды. Оның үстіне, заманауи зымыран технологияларын ескерсек, бұл кемелердің ауқымды соғыста қаншалықты маңызды рөл атқара алатыны үлкен сұрақ тудырып отыр. Ал Израильдің Иранға қарсы жалғыз өзінің шамасы жетпейді»,-деді.
Сарапшы Унал Америка Құрама Штаттарының бұл қақтығыстан тезірек шығуы оның болашағы мен қауіпсіздігі үшін өте маңызды деп есептейді.
Хасан Унал: «Трамп кезінде соғысқа итермелеген израильдік лоббидің қысымына бой алдырған еді. Бірақ қазір оның Израильге қарсы көзқарасы бұрынғыдан да күшейді. Бұл оның соғысқа кіру арқылы израильдік жалған ақпарат пен бұрмаланған сараптаманың тұзағына түскенін түсінуімен байланысты», -деді.
Ол сондай-ақ: «Трамптың сайлаушылары Израильге қатты наразы. Кеше және бүгін жүргізілген сауалнамалар Америка халқының кем дегенде 60 пайызы Израильге тікелей қарсы екенін көрсетті. Ал соғысқа дейінгі сауалнамаларда халықтың 70 пайыздан астамы кез келген соғыс қимылдарына қарсы болған», -деді.
Саясаттанушының пікірінше, Израиль премьер-министрі Биньямин Нетаньяху бейбітшілік үдерісін бұзу үшін Ливанды бомбалауын күшейткен.
Сарапшы: «Бірақ қазір Биньямин Нетаньяху жаппай бомбалауды тоқтатып, бұл шешімді Трамптың қысымымен емес, Ливан премьер-министрімен жүргізілген келіссөзден кейін қабылдағанын айтып ақталды. Қалай болғанда да, Нетаньяху Хезболлаға қарсы ешқандай әскери жетістікке жете алмады», — деді.

















