БҰҰ Балалар қоры (ЮНИСЕФ) кеше, жексенбі күні Ливанға 25 тонна медициналық көмек жіберді.
Еуразия Тудейдің Синьхуа агенттігіне сілтеме жасап хабарлауы бойынша, Ливанның Денсаулық сақтау министрі Фирас Абиад бұл көмекті ауруханалар мен денсаулық сақтау секторындағы қиын жағдайға байланысты маңызды деп атады.
Бұл туралы Фирас Абиад Бейруттағы Рафик Харири атындағы халықаралық әуежайында өткен қайырымдылық рәсіміне қатысқан кезде мәлімдеді.
Фирас Абиад: «Бұл көмек ауруханаларымыздың жұмысын жалғастырып, медициналық жәрдемге мұқтаж 1,2 миллион адамға көмегін тигізеді»,-деді.
ЮНИСЕФ-тің Ливандағы өкілі Эдуард Бейгбедер аталмыш шара барысында сөйлеген сөзінде медициналық көмектің жалпы көлемі 67 тоннаны құрайтынын және бірнеше ауру түріне ұшыраған 700 мың адамға көмек көрсете алатынын айтты.
Сондай-ақ, жексенбі күні Ливан Премьер-министрі Наджиб Миқати Бейрутке сапармен келген БҰҰ-ның босқындар ісі жөніндегі Жоғарғы комиссары Филиппо Грандимен кездесіп, Ливандағы сириялық босқындар дағдарысын шешуге көмектесуге шақырды.
Наджиб Миқати кеңсесі таратқан мәлімет бойынша, ел Премьер-министрі мыңдаған ливандықтың өз отанында босқынға айналғанын, Ливан бұдан былай сириялық босқындардың ауыртпалығын көтере алмайтынын айтты.
Ливан Премьер-министрі бұл азапты тоқтатудың жалғыз жолын Израиль басқыншылығын тоқтатып, 1701 резолюциясын орындау үшін атысты дереу тоқтату деп атады.



















