450-ге жуық бала екі күн ішінде Өзбекстанның Наманган облысы Чуст ауданының ауруханаларына улану туралы шағым түсірген.
Қазіргі таңда Наманган облысында жүздеген баланың ауруханаға түсуіне байланысты қылмыстық іс қозғалды.
Өзбекстан Президенті Шавкат Мирзиеевтің тапсырмасы бойынша президенттің көмекшісі Саида Мирзиеева 450 бала ауруханаға түскен аймаққа барды.
Президент көмекшісінің сөзінше, балалардың жағдайы жақсы, көбісі үйіне қайтқан.
Мирзиеева Наманган прокуратурасы қылмыстық іс қозғап, бас прокуратураға жібергенін жеткізді. Іс «Санитарлық заңдарды және эпидемияға қарсы күрес ережесін бұзу» бабы бойынша қозғалған.
Чуст ауданында уланғандар аудандағы тоғыз балабақша тәрбиеленушілері мен екі орта мектептің оқушылары болған.
Ата-аналар балаларға йод бергенін айтқан. Себебі Өзбекстанда әр сәрсенбі сайын балаларға йод бере бастаған. Балалар йодтан улануы мүмкін деген болжам айтылады.
Денсаулық сақтау министрлігі Өзбекстанда шығарылатын «Антиструмин» калий-йодын тергеу аяқталғанша қолдануға тыйым салды.



















