Қырғыз Республикасының Сыртқы істер министрлігі мәлімдеме жариялап, өз елінің азаматтарын Судан Республикасындағы тұрақты армия мен жедел әрекет ету күштері арасындағы қарулы қақтығыстар салдарынан жағдайдың шиеленісуіне байланысты осы елге барудан бас тартуға шақырды.
Ал сол елде жүрген азаматтарына тұрғылықты жерлерінде қалуға, әуежайларға, әскери базаларға және үкіметтік кварталға жақын жерлерге барудан аулақ болуды сұрады.
Қырғыз Республикасының Сауд Арабиясы Корольдігіндегі Елшілігінің соңғы мәліметі бойынша, Қырғыз Республикасының 7 азаматы Судан Республикасында жүр. Оның 3-і БҰҰ-ның Хартумдағы бөлімшесінде жұмыс істейді.
Еске салайық, Судан ұлттық армиясы мен жедел әрекет ету күштері (RSF) деп аталатын жасақ арасындағы шайқас жеті күн бұрын басталған. Қарулы қақтығыстар бейбіт тұрғындардың өміріне және Судан халқына гуманитарлық көмек көрсету операциясының барысына жойқын әсер етті.



















