АҚШ президенті Джо Байден Алексей Навальныйдың әйелі Юлия Навальная және қызы Дарьямен кездесіп, көңіл айтты.
Reuters агенттігінің хабарлауынша, Джо Байден кеше, бейсенбі күні Сан-Францискода Юлия Навальная және қызы Дарьямен кездесуінде Алексей Навальныйдың керемет батыл адам болғанын тілге тиек етіп, көңіл айтты.
Джо Байден кездесу барысында Навальныйдың өліміне қатысты Ресейге қарсы санкция шараларын әзірлеп жатқанын мәлімдеді.
Бұған дейін де Байден Калифорнияда журналистермен кездесуінде Вашингтон Навальный өліміне қатысты Ресей мен Владимир Путинге қарсы көптеген санкция салуды жоспарлап отырғанын мәлімдеген болатын.
Сондай-ақ, АҚШ Мемлекеттік хатшысының орынбасары Виктория Нуланд бейсенбі күні жақын арада жарияланатын санкциялардың кейбірі Навальныйдың өліміне жауапты адамдарға бағытталатынын атап өтті.
Еске сала кетсек, 16 ақпан күні ресейлік оппозиционер Алексей Навальный Ямало-Ненец автономды округіндегі №3 түрмеде көз жұмды.















