Әлем елдері Иран президенті Ибраһим Раиси мен оның делегациясы, соның ішінде Сыртқы істер министрі Хоссейн Амир Абдуллаһианның ұшақ апатынан қайтыс болуына байланысты Иран халқына көңіл айтып жатыр.
Ибраһим Раиси мінген тікұшақ 19 мамырда Иранның солтүстік-батысындағы Верзеған ауданында қолайсыз ауа-райына байланысты апатқа ұшырады. Тікұшақ сынықтары 20 мамырда таңертең табылды.
Ибраһим Раисиден басқа тікұшақта елдің Сыртқы істер министрі Хоссейн Амир Абдуллаһиан, Тебриз қаласының Бас мешітінің имамы, Шығыс Әзірбайжан провинциясының губернаторы Малек Рахмати және тағы бес адам (оққағарлар мен экипаж мүшелері) болды. Апаттан аман қалғандар жоқ.
Иран президентінің қазасына байланысты бұл елде бескүндік қаралы күн жарияланды.
Әлем елдері Иран президенті Ибраһим Раиси мен оның делегацияларының қайтыс болуына байланысты көңіл айтуда.
Владимир Путин: «Раиси барлық ғұмырын өз Отанына қызмет етуге арнаған көрнекті саясаткер болды
Ресей президенті Владимир Путин Иран президенті Ибраһим Раисидің қайтыс болуына байланысты Иранның жоғарғы көшбасшысы аятолла Әли Хаменеиге көңіл айту жеделхатын жолдады.
«Президент Сейед Ибраһим Раисидің, сондай-ақ басқа да бірқатар мемлекет қайраткерлерінің ұшақ апатынан қайтыс болуына, Иран Ислам Республикасы халқының басына түскен орасан зор қайғыға байланысты қайғырып көңіл айтамыз», деп жазылған жеделхатта.
Путин Раисидің барлық ғұмырын өз Отанына қызмет етуге арнаған көрнекті саясаткер болғанын, Ресейдің шынайы досы ретінде елдер арасындағы тату көршілік қатынастардың дамуына баға жетпес жеке үлес қосқанын және оларды стратегиялық серіктестік деңгейіне жеткізуге көп күш салғанын атап өтті.
Ресей президенті осы апатта қаза тапқан Президенттің және оның қасында болғандардың отбасылары мен жақындарына көңіл айтып, сабырлыққа шақырды.
Ресейдің Тегерандағы елшілігі Иран халқымен ынтымақтастық белгісі ретінде туды түсірді.
Си Цзиньпин: Қытай халқы жақын досынан айырылды
Қытай Сыртқы істер министрлігінің баспасөз хатшысы Ван Вэньбиньнің мәлімдеуінше, ҚХР Төрағасы Си Цзиньпин Иранның Бірінші вице-президенті Мохаммад Мохберге көңіл айту жеделхатын жолдады және тікұшақ апатынан Иран президентінің қайтыс болуына байланысты Қытай үкіметі мен халқының атынан көңіл айтты.
Си Цзиньпин жеделхатта Раисидің қайғылы өлімі Иран халқы үшін үлкен қаза екенін, сондай-ақ Қытай халқы жақын досынан айырылғанын атап өткен.
Қазақстан
Қазақстан Президенті Қасым-Жомарт Тоқаев көңіл айту жеделхатын жолдады.
«Мемлекет басшысы Қазақстан халқының атынан және өз атынан Иран Ислам Республикасының жоғарғы көшбасшысы аятолла Әли Хаменеиге, Бірінші вице-президенті Мохаммад Мохберге және бүкіл Иран халқына Ибраһим Раиси мен үкіметтік делегация мүшелерінің Шығыс Әзірбайжан провинциясындағы тікұшақ апатынан қаза болуына байланысты көңіл айтты», – деп хабарлады Ақорданың баспасөз қызметі.
Қасым-Жомарт Тоқаев Ибраһим Раисидің өмір бойы Иран мемлекеті мен халқының әл-ауқатын көтеруге, мүддесінің мұқалмауына, аймақтағы тұрақтылықты сақтауға өз өмірін шынайы арнаған көрнекті мемлекет қайраткері болғанын атап өтіп, Қазақстанда Ибрагим Раиси әрқашан жауапты көшбасшы, халықаралық деңгейдегі беделді саясаткер, екіжақты ынтымақтастықты нығайтуға зор үлес қосқан тұлға ретінде есте қалатынын айтты.
Өзбекстан
Өзбекстан Президенті Шавкат Мирзиеев Иранның жоғарғы көшбасшысы аятолла Әли Хаменеиге жолдаған көңіл айту жеделхатында достас Иран халқына, қаза тапқандардың отбасылары мен жақындарына көңіл айтты.
«Өзбекстан мен Иран арасындағы жан – жақты ынтымақтастықты, өзара тиімді және ұзақ мерзімді серіктестікті дамытуға зор үлес қосқан Ибраһим Раиси туралы жарқын естеліктер біздің халықтарымыздың жүрегінде мәңгі қалады», — делінген жеделхатта.
Тәжікстан
Тәжікстан Президенті Эмомали Рахмон Иран Ислам Республикасы Президентінің Бірінші вице-президенті Мохаммад Мохберге және жоғарғы көшбасшысы аятолла Әли Хаменеиге Ибраһим Раисидің қайғылы қазасына байланысты көңіл айту жеделхатын жолдады.
«Иран Ислам Республикасының Президенті Ибраһим Раисидің және онымен бірге болған адамдардың ұшақ апатынан қаза тапқаны туралы қайғылы хабарды бүкіл Тәжікстан халқы қатты қайғырып қабылдады», — делінген хабарламада.
Түркіменстан
Түркіменстан Президенті Сердар Бердімұхамедов пен түрікмен халқының Ұлттық көшбасшысы, Халық Мәслихатының төрағасы Гурбангулы Бердімұхамедов Иранның басшылығы мен халқына көңіл айтып, ынтымақ пен қолдау білдірді.
Әзірбайжан
Әзірбайжан Президенті Илһам Алиев Иран Ислам революциясының жетекшісі аятолла Әли Хаменеиге, сондай-ақ қаза тапқандардың отбасылары мен жақындарына көңіл айтып, Иран халқы өмір бойы өз еліне адал қызмет еткен көрнекті мемлекет қайраткерінен айырылғанын атап өтті.
Раиси 19 мамыр күні таңертең Әзірбайжанмен шекарадағы Тебризде Илһам Алиевпен бірге «Қиз қаллехси» бөгетін іске қосу рәсімінен кейін қайтып бара жатқан сәтте апатқа ұшырады.
Түркия
Өз кезегінде Түркия Президенті Режеп Тайып Ердоған Анкара осы қиын кезеңде Тегеранды қолдайтынын мәлімдеді.
«Мен оның билікте болған кезінде Иран халқы мен біздің территориямызға бейбітшілік орнату жөніндегі күш – жігерінің куәсі болған әріптесім ретінде Президент Раисиді құрметпен және ризашылықпен еске аламын», — делінген жеделхатта.
Сирия
Сирия Президенті Башар Асад өзінің және сириялық араб халқының атынан Иран Ислам революциясы жетекшісі аятолла Әли Хаменеиге Иран Президенті Ибраһим Раисидің, Сыртқы істер министрі Хоссейн Амир Абдуллаһианның және олардың жанында болғандардың қайтыс болуына байланысты достас Иран үкіметі мен халқына көңіл айтты.
Еуропалық Одақ
Еуропалық Кеңестің президенті Чарльз Мишель Иран Президенті Ибраһим Раиси мен Сыртқы істер министрі Хоссейн Амир Абдуллаһианның, сондай-ақ олардың делегациясы мен экипаж мүшелерінің тікұшақ апатынан қайтыс болуына байланысты көңіл айтты.
Сонымен қатар, БАӘ Президенті шейх Мұхаммед бен Заид Әл Нахаян Иран үкіметі мен халқына көңіл айтып, осындай қиын кезеңде Иранды қолдайтынын мәлімдеді.
Пәкістан елі Ибраһим Раисидің қайтыс болуына байланысты аза тұту күнін жариялады. Үндістан Премьер-министрі Нарендра Моди елінің осындай қайғылы кезеңде Иранмен бірге екенін мәлімдеді. Мысыр пен Иордания басшылары да Тегеранға көңіл айтты.



















