Кеше, сәуірдің 22 күні Қазақ Ұлттық қыздар педагогикалық университетінде Алматы мен Астана қалаларының жоғары оқу орындарында парсы тілін екінші шет тілі ретінде оқитын студенттер арасында тілдік олимпиада өтті.
Іс-шараны Қазақ Ұлттық қыздар педагогикалық университеті мен Алматыдағы ИИР Бас консулдығының мәдени өкілдігі және «Сағди» қорының Алматыдағы өкілдігі ұйымдастырды.
Олимпиаданың ашылу салтанатында Алматы қаласындағы Иран Ислам Республикасының Бас консулы Мохсен Фақани, Алматыдағы Иран Ислам Республикасы Бас консулдығының атташесі доктор Хоссейн Ағазаде, Қазақ ұлттық қыздар педагогикалық университетінің ғылыми жұмыс және халықаралық ынтымақтастық жөніндегі проректоры Жұмақұлов Закир Даниярович, Филология институтының директоры Ашинова Күнипа Ахатовна, кафедра меңгерушілері, оқытушылар, студенттер және Қазақстанның жоғары оқу орындарының парсы тілі мен әдебиетінің оқытушылары, ирантанушылар, аудармашылар, Әл-Фараби атындағы ҚазҰУ пен Л.Гумилев атындағы Еуразия ұлттық университетінің студенттері қатысты.
Олимпиада өте жоғары деңгейде өтті. Қатысқан студенттердің сынақ нәтижелері негізінде жеңімпаздар анықталды.
Олимпиаданың жабылу салтанатында Алматыдағы Иран Ислам Республикасы Бас консулдығының атташесі доктор Хоссейн Ағазадэ жеңімпаздарды марапаттап, оларға халықаралық деңгейдегі Куәлік пен ақшалай сыйақы берді. Іс-шараға белсенді қатысқан студенттерге Алғыс хат табыс етілді.



















