Иран Сыртқы істер министрі Аббас Арақчи туындаған қиындықтарға қарамастан Еуропа елдерімен келіссөз жалғасатынын мәлімдеді.
Еуразия Тудейдің хабарлауы бойынша, Аббас Арақчи талқылаулар барысында егжей-тегжейлі қарастыруды қажет ететін мәселелер көтерілетінін айтты.
Иран СІМ басшысы кеше, сәрсенбі күні министрлер кабинеті отырысы аясында журналистер алдында сөйлеген сөзінде екі күн бұрын Женевада Еуропаның үш елі өкілдерімен келіссөздердің жаңа кезеңі өткеніне тоқталып: “Басты назар Иранның ядролық бағдарламасына қатысты мәселелерге, сондай-ақ, басқа да бірқатар өзекті тақырыпқа аударылды”, — деді.
Арақчи тілшілердің Ресей Сыртқы істер министрі Сергей Лавровтың ықтимал хабарлама жеткізуі туралы сұрағына жауап беріп, мұндай болжамдардың шындыққа жанаспайтынын айтты. Арақчи: “Біз Лавровпен жан-жақты келіссөз жүргіздік. Соның барысында өңірлік мәселелер мен екіжақты қарым-қатынасты жете талқыладық. Ол бізге АҚШ пен аймақтағы басқа елдермен жүргізген келіссөздері туралы толық есеп берді.
Бірақ, ол ешқандай хабарлама жеткізбеді, себебі мұндай мақсат қойылмаған”, — деп мәлімдеді.
Арақчи “Ортақ қадам” жан-жақты бағдарламасын қайта бастау туралы елінің өзгермейтін ұстанымын қуаттап: “Біздің ұстанымымыз Американың барынша қысым көрсету саясатын бастап, президентінің тиісті жарлықтарына қол қойған кезден бері анық айтылды. Иран қысым жағдайында келіссөз жүргізбейді. Мұндай қысым көрсету стратегиясы бұрын да қолданылған және оң нәтиже бермеді”, — деді.
Министр Тегеранның сыртқы қысымға бағынбай, халықаралық келіссөздерде принципті көзқарасты ұстанатынын баса айтты.

















