Түркия Президенті Режеп Тайып Ердоған Израильдің Иранға шабуыл жасау себебін Тель-Авивтің не істеп жатқанын түсінбейтін Батыстың қолдауынан болды деп атады.
Еуразия Тудейдің хабарлауы бойынша, бұл туралы Түркия Президенті Министрлер кабинетінің отырысынан кейін халыққа жасаған мәлімдемесінде айтты.
Режеп Тайып Ердоған: “Батыстың шексіз қолдауымен Иранға шабуыл жасап, Газа секторын ойрандап, аймақтағы барлық елді келеке етіп отырған Израиль не істеп жатқанын түсінбейді. Ол болашақта қателігін түсінуі мүмкін. Алайда біз бұл тым кеш болады деп қорқамыз. Ешбір ел өз шекарасымен ғана шектелмейді. Аймақтағы әрбір оқиға барлық қоғамға әсер етіп, орта және ұзақ мерзімді салдарын тигізеді.
Палестина халқы мен оның жеріне жасалған шабуыл бірнеше миллион адаммен шектелмейді. Иранға жасалған шабуыл тек Иранға ғана қатысты емес”,- деді.
Айта кетейік, сионистік режим 13 маусымға қараған түні Иранға әуеден шабуыл жасады. Израиль үкіметі Иранның ядролық, азаматтық нысандары мен жоғары шенді әскери басшылары және ядролық ғылыммен айналысқан ғалымдарын нысанаға алды.
Иран Израильдің бұл соққысына зымырандар және ұшқышсыз ұшу аппараттары арқылы жауап берді.

















