Кеше, 17 қыркүйек күні Иранның діни жетекшісі аятолла Әли Хаменеи Парижде өткен Олимпиада және Паралимпиада ойындарына қатысқан спортшылармен кездесті.
Еуразия Тудейдің хабарлауы бойынша, Әли Хаменеи кездесу барысында ирандықтардың қабілеттерінің, ұлттық, саяси және діни болмыстарының көрінісін ирандық спортшылардың осы жарыстарға қатысуының ең көрнекті нәтижесі деп атады. Хаменеи: «Талантты дер кезінде табу, жеңімпаздардың өміріне қамқорлық жасау және бір мезгілде спортқа, жалпы жұртшылыққа көңіл бөлу спорттың алға жылжуы мен қарқынын арттырады»,- деді.
Иранның жоғарғы көшбасшысы елінің мақтанышына айналған перзенттерінің бір тобымен кездесуіне үлкен ризашылығын білдіріп: «Сіздер өз медальдарыңызбен және талпыныстарыңызбен халықты қуанттыңыздар. Сіздерге, жаттықтырушыларға және қатысқандардың барлығына шын жүректен алғыс айтамын»,- деді.
Хаменеи спортқа байыппен қарау керектігін айтып, осы кездесуде Спорт министрінің спорттың әлеуметтік-психологиялық және үміт тудыратын әсері туралы жан-жақты сөзіне тоқталып: «Спорт қоғамдық дипломатияға түбегейлі әсер етіп, тұтастай алғанда елді көтереді. Сіздер кәсіби және спорттық қабілеттеріңізді көрсетумен қатар, жеңістеріңізді Палестина мен Газа cекторындағы балаларға сыйлау, Палестина туымен суретке түсу және тағы басқа да мағыналы әрекеттерізбен рухани қабілеттеріңізді, ұлттық-діни және исламдық болмыстарыңызды көрсетіп, құрметтедіңіздер»,- деді.
Хаменеи сөзінің жалғасында: «Мен бұл өте құнды іс-әрекеттердің әрқайсысына мән беріп, оның терең мағынасын халыққа түсіндіремін. Бір елге соғыс салдарынан жарысқа қатысуға тыйым салынса, бір жыл ішінде 41 мың палестиналықты, соның ішінде мыңдаған баланы өлтірген Израильге жарысқа қатысуға тыйым салынбады. Осымен бірнеше рет айтқанымыздай, спорт саяси емес деген тұжырымға қарамастан, бұл екіжүзді саясат ең көп саяси әрекеттердің спортта жүзеге асатынын көрсетеді. Сіздердің амалдарыңыз көп адамға, әсіресе жастарға үлгі болады. Сондықтан халықаралық аренада бүкіл әлемге дінге, этикаға және діни, саяси және әлеуметтік жауапкершіліктерге деген құрметтеріңізді көрсеткендеріңіздей, жұмыс пен өмірде де осы маңызды жауапкершіліктерге құрметпен қарау керек»,- деді.
Кездесуде Паралимпиада ойынында тапанша атудан бірнеше алтын медаль иегері Сара Джаванмарди, таэквондодан Париж Олимпиадасының алтын жүлдегері Ариaн Салими және ауыр атлетикадан Иранның алтын жүлдегері, зілтемірші Рухолла Рустами спортшылар атынан Ислам революциясы жетекшісінің дұғалары, құттықтаулары мен қолдауы үшін алғыс айтты.


















