Иран Сыртқы істер министрлігінің ресми өкілі Исмаил Бақайи елінің әлемдік үстемдікке төзбейтін және халықаралық жауапкершілікті сезінетін мемлекет екенін баса айтты.
Еуразия Тудейдің хабарлауы бойынша, Исмаил Бақайи Вашингтонның айыптауларына қатысты мәлімдеме жасап, Америка Құрама Штаттарының іс-әрекеттерін қауіп-қатердің шынайы көзі ретінде сипаттады.
Иран Сыртқы істер министрлігінің ресми өкілі бүгін, дүйсенбі, 11 мамыр күні өткен баспасөз конференциясында Америка Құрама Штаттары басшылығының соңғы кездегі өткір мәлімдемелеріне түсініктеме берді.
Бұған дейін АҚШ президенті мен Мемлекеттік хатшысы Иранды аймақ елдеріне қысым көрсетіп, ресурстарды зымырандық қару-жараққа жұмсап отырған озбыр держава ретінде сипаттаған болатын.
Бақайи Иранның өзін аймақтағы мықты жауапты күш ретінде танытқанын, алайда тарихи және ментальды тұрғыдан Иран халқының озбырлыққа төзбейтінін атап айтып: «Біз — әлемнің мықтылары тарапынан болатын мәжбүрлеу мен қорлауға көнбейтін ұлтпыз», -деді.
Дипломат нақты фактілерге назар аударуға шақырып: «Біз Америкаға басып кірдік пе? Бір күнде 170 бейбіт тұрғынды өлтірген біз бе?» -деген сауал қойды.
Ол сондай-ақ, Вашингтонның Куба мен Венесуэлаға жасап отырған қысым саясатын да еске салды.
Иран Сыртқы істер министрлігінің ресми өкілі Вашингтонның халықаралық аренадағы деструктивті саясатын сынға алып, АҚШ-тың өзге елдердің инфрақұрылымын қиратып, дипломатия атын жамыла отырып, саяси тұлғалар мен бейбіт халыққа қарсы қастандық жасауын айыптады.
Исмаил Бақайи: «Біздің іс-әрекетіміз — сөзіміздің айқын дәлелі. Біз ешқашан басқыншылық жасаған емеспіз. Алайда Иран өз үстемдігін күштеп орнатқысы келетіндерге әрқашан лайықты қарсылық көрсетеді»,-деп сөзін қорытындылады.

















