Иран шикі мұнайды 17 елге, соның ішінде кейбір еуропалық елдерге экспорттап отыр.
Еуразия Тудейдің ISNA агенттігіне сілтеме жасап хабарлауынша, Иранның Мұнай министрі Джавад Оуджи қазіргі уақытта елінің шикі мұнайды 17 елге, соның ішінде кейбір еуропалық елдерге экспорттап отырғанын мәлімдеді.
Джавад Оуджи Иран АҚШ-та билікке кім келетініне қарамастан, мұнай экспортында ешқандай қиындықтарға тап болмайтынын қуаттады.
Иранның Мұнай министрі сейсенбі күнгі салтанатты рәсімде сөйлеген сөзінде соңғы үш жылда мұнай өнеркәсібіне жақсы инвестиция салынғанын айтты.
Джавад Оуджидің айтуы бойынша, Иран 2021 жылы марқұм Ибраһим Раисидің билігі тұсында күніне 2,2 миллион баррель мұнай өндірді.
Ол сөзінің жалғасында Иран мұнайының экспорты 2019 жылы 182 миллион баррель болса, өткен жылы бұл көрсеткіш 565 миллион баррельге дейін өскенін айтты.
Иран мұнай өндіруі мен сату қарқындылығының күрт өсуіне байланысты Мұнай экспорттаушы елдер ұйымында (ОПЕК) төртінші ірі мұнай экспорттаушы елге айналды.
Vortexa есебі бойынша, Иранның мұнай мен газ конденсатының экспорты қазіргі уақытта ең жоғары деңгейге жетті.
Иран биылғы жылдың қаңтар-мамыр айларында күніне 1,56 миллион баррель мұнай экспорттады. Бұл Кувейт пен Нигерия тәулігіне экспорттаған көрсеткіштен 250 мың баррельге артық. Батыс елдерінің санкцияларына қарамастан, Иран мамыр айында шикі мұнай мен газ экспортын тәулігіне 1,7 миллион баррельге дейін арттыра алды. Бұл — соңғы бес жылдағы ең жоғары көрсеткіш.
Vortexa есебінде Иран мұнай экспортының күрт өсуіне ықпал ететін негізгі факторлар ретінде Қытайдағы мұнайға сұраныстың артуы және Иран мұнай танкерлері флотының кеңеюі аталған.


















