Орталық банк саясаты енгізілгеннен кейін Иранның мұнайдан тыс экспортының көлемі артты.
Еуразия Тудейдің хабарлауы бойынша, Иран Орталық банкінің ресми бағам мен нарықтық бағам арасындағы алшақтықты азайтуға бағытталған жаңа саясаты елдің экспорттық әлеуетін айтарлықтай арттырды.
Иранның Кеден басқармасы (IRICA) жариялаған деректерге сәйкес, 20 қаңтарға дейінгі бір аптада бұл елдің мұнайдан тыс экспортының құны 1,7 миллиард АҚШ долларына жетті. Бұл алдыңғы аптамен салыстырғанда 108 пайызға көп.
IRICA мәліметінше, осы кезеңде шетелге жеткізілген тауар көлемі 60 пайызға өсіп, 3,449 млн метрикалық тоннаны құрады.
Иранның Орталық банкі осы айдың басында ресми бағам мен еркін нарықтағы бағам арасындағы айырманы қысқарту шараларын жариялағаннан кейін экспорттық белсенділік күрт артты.
Бұл саясат көптеген экспорттаушыларды валюта түсімдерін мемлекет реттейтін Интеграцияланған валюта жүйесіне (Integrated Currency System, ICE) бағыттауға ынталандырды. Аталған платформада импорттаушылар валютаны тиімді бағамдармен сатып ала алады.
Экспорттан түсетін қаражаттың Иран Орталық банкіне көбірек түсуі ирандық мұнай-химия және болат өндірушілер үшін қосымша экспорттық квоталар беруге де мүмкіндік жасап отыр.
Орталық банктің бұл қадамы еркін нарықтағы шетелдік валюта бағасының төмендеуіне де септігін тигізді. Қаңтар айының басымен салыстырғанда валюта бағамдары 8 пайызға дейін арзандаған.
Иран 20 қаңтарға дейінгі аптада негізгі тауарлар импортын 38 пайызға арттырды. Бұған дейін Иранның оңтүстік порттарында валюталық төлемдерге қатысты мәселелер туындап, аса қажет тауарларды түсіру жұмыстары кешіктіріліп келген болатын. Жаңа саясат бұл логистикалық түйткілдердің шешілуіне де оң ықпал етпек.


















