Әйгілі боксшы Майк Тайсон кеше, 16 қарашада Өзбекстан астанасы Ташкент қаласына келді.
Майк Тайсон Өзбекстанда өтіп жатқан WBC конвенциясы жабылу кешінің құрметті қонағы ретінде бокс кешіне қатысады.
Бұл тек Өзбекстан үшін емес, барлық орталық Азия үшін ауқымды іс-шара.
61 рет ұйымдастырылып жатқан кеңеске WBC ұйымының президенті Маурисио Сүлейман, Өзбекстан бокс федерациясының басшылары мен танымал спортшылар қатысып жатыр.
Бұл шара Орталық Азия елдері арасында Өзбекстанда алғаш рет өткізіліп отыр.
Майк Тайсон қазір осы конвенциясы аясындағы шарада. Бүгін, 17 қарашада Humo Arena-да үлкен кәсіпқой бокс кеші өтеді. Оған Майк Тайсон, Александр Усик, Эвандер Холифилд және өзге де атақты былғары қолғап шеберлері қонақ ретінде қатысады.
Айта кетсек, Ташкент төріндегі бокс бәсекесінде қазақстандық боксшы Мейірім Нұрсұлтанов шаршы алаңға көтеріледі. Ол чилилік боксшы Хулио Аламоспен жұдырықтасады.



















