Өзбекстан астанасы Ташкент қаласында high-tech стиліндегі жаңа мешіт ашылды.
Бұл туралы Sputnik Uzbekistan агенттігі хабарлады.
Қасиетті Рамазан айында Ташкент қаласының Чиланзар ауданында high-tech стилінде жасалған «Хасанхон Кори» мешіті қайта ашылды.
Өзбекстан мұсылмандары кеңсесінің хабарлауы бойынша, ғимараттың тар әрі ыңғайсыз кіреберісі келушілерге қиындық тудырған. Мешітке келушілерге қажетті жағдай жасау мақсатында ғимаратты жөндеуден өткізуге шешім қабылданған. Осылайша, мешіт ғимараты келушілерге ыңғайлы етіп қайта жасалу үшін заманауи құрылыс материалдары кеңінен қолданылды.
«Хасанхон Кори» мешітінің құрылысы 2021 жылы басталды. Алдыңғы ғимарат осыдан отыз жыл бұрын салынған болатын. Ол кезде мешітке шамамен 1000-нан астам адам ғана сыятын.
Бүгінгі күні жаңартылған «Хасанхон Кори» мешітінде кең әрі ыңғайлы екі кіреберіс, бір уақытта 4,5 мың адамға дейін сыятын үлкен намазхана бар.
High-tech — заманауи архитектуралық стиль. Діни ғимараттар архитектурасында high-tech стилі соңғы онжылдықтарда белсенді түрде қолданылып келеді.



















