Өзбекстан астанасы Ташкент қаласында Моңғолия елшілігі ашылады деп күтілуде.
EADaily агенттігінің хабарлауы бойынша Моңғолия Парламентінің Төрағасы Занданшатар Гомбожав Ташкентте елшілік ашу жобасын ұсынды.
Жоба бойынша елшілікте үш қызметкер жұмыс істейтін болады. Елшілікті ашу жөніндегі шығындар 2024 жылдың бюджетіне салынған.
Жақын арада Моңғолия үкіметі Өзбекстан тарапымен ынтымақтастық туралы Меморандумға қол қоюды жоспарлап отыр. Моңғолия Өзбекстанда елшілік ашу арқылы Орталық Азия елдерімен сауданы ұлғайтуға ниетті.
2023 жылы Моңғолия Сыртқы істер министрі Батмөнхийн Батцэцэг Моңғолия СІМ көпжақты ынтымақтастықты кеңейту және дипломатиялық өкілдіктер мен дипломаттар санын арттыру мақсатында жұмыс істеп жатқанын атап өтіп, Моңғолия Өзбекстан астанасында елшілік ашуды жоспарлап отырғанын мәлімдеді.
Сондай-ақ, бұған дейін Моңғолия СІМ алты елде консулдық ашуды жоспарлап отырғанын да хабарлады.
Осы мәліметке сәйкес, Өзбекстан мен Моңғолия арасындағы екіжақты тауар айналымының көлемі 2022 жылы 10,4 миллион долларға жетті.
Моңғолия үкіметі Өзбекстанды қазіргі уақытта жеңіл өнеркәсіп пен ауыл шаруашылығында жетекші орынға ие Орталық Азия аймағындағы ең ірі нарықтардың бірі санайды.



















