Ресей президентінің баспасөз хатшысы Дмитрий Песков елінің Вашингтондағы ұшақ апатынан қаза тапқандардың отбасыларына көңіл айтатынын мәлімдеді.
Еуразия Тудейдің хабарлауы бойынша, Вашингтон маңында апатқа ұшыраған жолаушылар лайнерінің бортында ресейліктер де болған.
Кремль өкілі: “Біз осы ұшақ апатынан қаза тапқан жерлестеріміздің отбасы мен жақындарына көңіл айтамыз. Өкінішке орай, біз бұл қайғылы оқиғаның расталғанын көріп отырмыз”, — деді.
Айта кетейік, 30 қаңтарда American Airlines компаниясына тиесілі жолаушылар ұшағы Вашингтондағы Рональд Рейган әуежайының маңында Black Hawk тікұшағымен соқтығысты.
Ұшақ бортында ресейлік мәнерлеп сырғанаушылар мен жаттықтырушылар тобы болған.
РИА Новости агенттігінің мәліметінше, апатқа ұшыраған жолаушылар ұшағында мәнерлеп сырғанаудан 1994 жылғы әлем чемпиондары Евгения Шишкова мен Вадим Наумов болған.
Reuters агенттігінің хабарлауынша, Канзас штатынан ұшып шыққан жолаушылар ұшағында 64 адам, оның ішінде 60 жолаушы мен төрт экипаж мүшесі болған. Сонымен қатар ұшаққа соғылған тікұшақта үш әскери қызметкер болған. Ұшақ та, тікұшақ та Потомак өзеніне құлаған.
Оқиға салдарынан борттағы 67 адамның барлығы қаза тапты.



















