НАТО келесі аптадан бастап Еуропадағы ең ірі Steadfast Defender жаттығуларын бастайды.
Бұл туралы НАТО-ның Еуропадағы Біріккен қарулы күштерінің жоғарғы бас қолбасшысы генерал Кристофер Каволи мәлімдеді.
Dumatv.ru сайтының мәліметі бойынша соңғы 40 жылда НАТО Еуропада дәл осындай ең үлкен әскери жаттығу өткізбеген. Бұған дейін НАТО мұндай ең ірі әскери жаттығуларын 1988 жылы өткізген. Жаттығуларға 125 мыңға жуық әскери қатысқан.
Биылғы жылы өткізілетін «Steadfast Defender» деп аталатын әскери жаттығуға 90 мыңға жуық әскери қатысады деп күтілуде.
Аталмыш ірі жаттығу Германия, Польша және Балтық елдерінде өтеді. Жаттығу мамыр айына дейін жалғасады. Жаттығуларға жақын арада альянсқа қосылуға үмітті Швеция да қатысады деп күтілуде.
НАТО мәліметінше, маневрлерге 50-ден астам кеме, 80-нен астам жойғыш ұшақ, тікұшақтар мен дрондар және мыңдаған жауынгерлік машина тартылады.
«Steadfast Defender» жаттығуының басты мақсаты ықтимал қауіп туындаған жағдайда еуроатлантикалық аймақ қабілетін көрсету болып табылады.



















