«Орталық Азия – Үндістан» форматындағы кезекті саммит 2027 жылы Үндістанда ұйымдастырылады.
Еуразия Тудейдің хабарлауы бойынша, бұл туралы Үндістан Премьер-министрінің Өзбекстанға жасаған мемлекеттік сапарының қорытынды брифингінде Үндістан Сыртқы істер министрлігінің Батыс бағыты жөніндегі хатшысы Сиби Джордж мәлім етті.
Сиби Джорджтың айтуынша, бұл саммитті өткізу туралы шешімді Үндістан Премьер-министрі Нарендра Моди жариялаған.
Джордж Үндістанның Орталық Азия елдерімен өзара іс-қимылды одан әрі тереңдетіп, серіктестікті сапалы жаңа деңгейге көтеруге ниетті екенін атап айтты. Оның айтуынша, бұл бағыттағы жұмыстарда Өзбекстан Үндістан үшін аса маңызды әрі негізгі серіктестердің бірі болып қала береді.
Сонымен қатар, дипломат Үндістан Премьер-министрінің Өзбекстанға сапары екіжақты қатынастарға жаңа серпін бергенін қуаттады.
Джорджтың сөзінше, екіжақты байланыстарды жан-жақты стратегиялық серіктестік деңгейіне көтеру, сондай-ақ білім беру, сауда, мәдениет, дәстүрлі медицина, экология және гуманитарлық салалардағы нақты нәтижелер əріптестікті дамытуға берік негіз қалайды.
Айта кетейік, «Үндістан – Орталық Азия» форматындағы алғашқы саммит 2022 жылдың қаңтар айында онлайн режимінде өтті.Шараға қатысушы көшбасшылар Орталық Азия елдері мен Үндістан арасындағы түрлі салалар бойынша ынтымақтастықты нығайтудың және кеңейтудің перспективаларын талқылап, жиын қорытындысы бойынша «Орталық Азия – Үндістан» бірінші саммитінің Декларациясы қабылданған болатын.



















