Өзбекстан Президенті Шавкат Мирзиеев 17 шілде күні Иран Ислам Республикасының жаңадан сайланған Президенті Масуд Пезешкианмен телефон арқылы сөйлесті.
Еуразия Тудейдің Mehr агенттігіне сілтеме жасап хабарлауы бойынша, телефон арқылы әңгімелесу барысында Шавкат Мирзиеев Масуд Пезешкианды президенттік сайлаудағы жеңісімен құттықтап, қызметіне табыс тіледі.
Мемлекеттер басшылары Өзбекстан мен Иран қарым-қатынасын одан әрі дамыту, сауда, инвестиция және көлік салаларындағы ынтымақтастықты арттыру мәселелері жөнінде пікір алмасты. Сонымен қатар екі мемлекеттің басшылары соңғы жылдары сауда мен жүк тасымалы көлемінің, бірлескен жобалар мен кәсіпорындардың, әуе рейстерінің артып келе жатқанын атап өтті.
Пезешкиан Иран Ислам Республикасының сыртқы саясатындағы Орталық Азия аймағы елдерімен қарым-қатынасты дамытудың басымдығына тоқталып, Өзбекстанмен достық қарым-қатынасты дамытуды маңызды деп атады.
Сондай-ақ, марқұм Раисидің президенттігі кезінде Иран мен Өзбекстан арасында бірнеше келісімге қол қойылғанын және осы келісімдерді толығымен жүзеге асыру үшін жаңа Үкімет те толық ынтымақтастықта болатынын айтты. Сондай-ақ, тараптар өңірлік күн тәртібіндегі өзекті мәселелер туралы да сөйлесті.


















