Қатар Сирия үкіметі мен “Сирия демократиялық күштері” (SDF) ұйымы арасындағы атысты тоқтатуды көздейтін келісімді құптады.
Еуразия Тудейдің хабарлауы бойынша, Қатар Сыртқы істер министрлігі мәлімдеме жасап, Сирия үкіметі мен SDG ұйымы арасындағы атысты тоқтату жөніндегі келісім мен толық интеграция үдерісін құптайтынын баса айтты.
Қатар Сыртқы істер министрлігінің мәліметінше, бұл қадам азаматтық татулықты нығайту, қауіпсіздік пен тұрақтылық деңгейін арттыру, сондай-ақ институционалдық мемлекет құру жолындағы маңызды кезең ретінде қарастырылады.
Сонымен қатар, Қатар Сирияның егемендігі мен бірлігін толық қолдайтынын тағы растап, Сирия халқының еркіндікке, дамуға және әл-ауқатқа деген заңды ұмтылыстарына қолдау білдірді.
Айта кетейік, мұның алдында Сирия Президенті Ахмед аш-Шараа Сирия үкіметі мен “Сирия демократиялық күштері” ұйымы арасында атысты тоқтату туралы келісімге қол қойылғанын мәлімдеді. Сирия үкіметі Башар Асад режимі құлатылғаннан бері еліндегі қауіпсіздікті қалпына келтіру үшін белсенді күш-жігер жұмсауда.



















