Иранның Мәдени мұра, туризм және қолөнер министрлігінің туризм саласы бойынша орынбасары Қазан-Теһран және кері бағытта тікелей рейс ашылғанын хабарлады. Бұл туралы ақпарат тілшісі IRNA ақпарат агенттігіне сілтеме жасап хабарлайды.
«Ресей – Ислам әлемі: KazanForum» XIV халықаралық экономикалық форумына қатысуға арнайы сапармен Ресейдің Қазан қаласына барған Иранның Мәдени мұра, туризм және қолөнер министрлігінің туризм саласы бойынша орынбасары Әли Асғар Шалбафиан сәрсенбі күннен бастап Қазан-Теһран және кері бағытта тікелей рейс ашылғанын айтты.
Сондай-ақ Татарстан мен Иранның астаналарынан басқа қалаларға да жаңа тікелей рейстер ашылатынына тоқталып өткен Әли Асғар Шалбафиан 1 маусымнан бастап Санкт-Петербург- Теһран және кері бағытта тікелей әуе қатынасы ашылатынын атап өтті.
Визаларды беру процесін жеңілдету үшін жүргізілген келіссөздерге тоқтала отырып, ол осы процестің соңғы жағдайы туралы: «Қазірдің өзінде Ресей азаматтарына әуежай визалары беріліп жатыр, ал екі елдің сыртқы істер министрліктерінің топтық турларға визаны алып тастау жоспары соңғы кезеңде»,- деді.


















