Өзбекстанның Самарқанд қаласында Азия әйелдер форумы өз жұмысын бастады.
Еуразия Тудейдің хабарлауы бойынша, Самарқандта «Әйелдердің экономикалық, әлеуметтік және саяси құқықтары мен мүмкіндіктерін кеңейту мәселелеріне өңірлік көзқарас» тақырыбына арналған Азия әйелдер форумы басталды.
Аталмыш іс-шараға 30-дан астам шет елден жоғары деңгейлі қонақтар, Шығыс Азия, Оңтүстік-Шығыс Азия, Оңтүстік Азия және Орталық Азия елдері парламенттерінің әйел-депутаттары, үкімет басшылары, 40-тан астам шет мемлекеттердің Өзбекстандағы өкілдіктері мен өкілдері, сондай-ақ жергілікті мемлекеттік органдар мен азаматтық қоғам институттарының өкілдері, жетекші әйел көшбасшылары, іскер әйелдер, саясаттанушылар, қоғам қайраткерлері, ғалымдар, экономика салалары мен басқа да салалардың өкілдері және БАҚ өкілдері қатысуда.
Сенат төрағасы Танзила Норбоева форумның салтанатты ашылуында Өзбекстан президенті Шавкат Мирзиеевтің форумға қатысушыларға деген құттықтауын оқыды.
Танзила Норбоева шарада сөйлеген сөзінде бүгінгі таңда әйелдердің елдің саяси, әлеуметтік, экономикалық және мәдени өміріне маңызды шешімдер қабылдауға қатысуы жыл сайын артып келе жатқанын атап өтті.
Шараның ресми ашылу салтанатынан кейін форумға қатысушылар тәжірибе алмасу, әйелдердің ғылымға, білімге және инновациялық қызметке қатысуын және кәсіпкерлік, көшбасшылық және инновациямен айналысудағы заманауи тәсілдерін зерделеу үшін параллельді сессияларға бөлініп, форум жұмысын жалғастырды.
Форумды өткізу туралы бастаманы Өзбекстан президенті Шавкат Мирзиеев БҰҰ Бас Ассамблеясының 78-ші сессиясында ұсынған болатын.



















